بعث حمزة علاء، حارس مرمى الأهلي السابق، برسالة وداعية للجماهير ولإدارة ولزملائه في النادي وذلك بعدما قرر الرحيل عن النادي الأحمر، بعد نهاية عقده الموسم المنقضي.

كتب علاء عبر حسابه على موقع التواصل الاجتماعي "إنستجرام": "أكيد الكلام جاي متأخر، وعشان كده حابب أعتذر. من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم جوه النادي الاهلي".

وواصل: "قرار الرحيل كان صعب، بس كان لازم أفكر في مستقبلي. يمكن الفرصة مجتش زي ما كنت بتمنى، بس كل حاجة بتحصل بيبقي ربنا سبحانه وتعالى كاتبها و رب الخير لا يأتي إلا بالخير. لجمهور النادي الأهلي العظيم، محبتكم وتقديركم عمرهم ما كانوا مرتبطين بعدد الدقايق اللي لعبتها، دايمًا كنتوا سند، في كل لحظة، في كل بطولة. حسيت معاكم إني أحسن حارس في العالم و انا بلعب في بطوله افريقيا و الاولمبياد. كل اللي بطلبه، إنكم تفضلوا فاكرين إني كنت واحد منكم، ابن من ابناء النادي الأهلي".

أكمل: "شكرًا على كل لحظة حسيت فيها إني جزء من الكيان، لزمايلي، إنتوا إخواتي وعيلتي اللي عمري ما هنسى أيامها و بتمني ليكم كل التوفيق و النجاح، ولكل مدرب اتمرنت معاه داخل النادي، شكراً من كل قلبي على كل لحظة دعمتوني فيها أو علمتوني فيها حاجة، ولكل عامل تشرفت بالشغل معاه، انتم عارفين ‏معزتكم عندي".

أتم: "ولشعب الاهلي، هفضل دايمًا مشجع للكيان، من قلب التالتة شمال. و يارب أرفع راسكم و اكون عند حسن ظنكم في خطوتي الجاية، و تكونوا ‏دايمًا في ضهري وسند ليا زي ما طول عمركم عودتوني، اشوف وشكم علي خير".