كشف الدولي رامي ربيعة، لاعب منتخب مصر والعين الإماراتي، كواليس رحيله عن صفوف القلعة الحمراء، والحديث عن المشاركة مع الفراعنة في كأس العالم 2026.

وقال رامي ربيعة، في تصريحات تليفزيونية: "في الأهلي كانوا شايفين إن سني كبر، وإن دي آخر موسمين ليا، وأنا كنت محتاج التقدير، طلبت رقمًا معينًا، والناس ربطته بعقود زيزو وتريزيجيه، رغم إنهم وقتها كانوا لسه ما انضموش للأهلي، وأنا أصلًا معرفش بياخدوا كام، ده رزق كل واحد، لكن أنا طلبت الرقم اللي يناسبني واللي موجود في سوق كرة القدم، ومش شايف إنه مبالغ فيه، خصوصًا إنها آخر فترة في مسيرتي".

وأضاف: "اتعرض عليّ مبلغ معين، وبعدها نادي العين تواصل معايا، القيد في مصر كان بيقفل يوم 30، والعين فاوضني يوم 26، وفي الوقت ده ناس كتير قالت إني رايح بيراميدز أو بتفاوض مع أندية تانية".

وأوضح: "الناس بتربط رحيلي عن الأهلي بالطمع في الفلوس، لكن الحقيقة غير كده".

وأكمل: "لو هرجع ألعب في الدوري المصري، مش هرجع غير للأهلي، إيه اللي يخليني أروح نادي تاني وأتعب نفسيًا؟ الأهلي مختلف، وبيخليك تحس إنك في أوروبا، سواء في طريقة التعامل أو الجماهير أو الإعلانات أو الأجواء بشكل عام".

وعن زيارة لاعبي الأهلي؟، قال: "في كأس السوبر بالإمارات، رحت سلمت على لاعبي الأهلي، ده انتمائي، وعمري ما ههرب منه، لأن الأهلي هو اللي صنع اسم رامي ربيعة، ودي حاجة أفتخر بيها".

وتطرق للحديق عن محمد صلاح وعمر مرموش، قال: "مرموش لاعب كبير جدًا، والنجوم في المباريات الكبيرة بيكون عليهم تركيز مضاعف من المنافسين، زي صلاح ومرموش، لأن كل الفرق عارفة قيمتهم، هما الاتنين هادئين جدًا، وبيعرفوا يتحكموا في أعصابهم".

وأضاف: "مرموش قريب مني جدًا، وعلاقته كويسة باللاعبين الكبار".

عن مباراة مصر والأرجنتين، قال: "من أول المباراة كنا متفقين إن أي التحام مع أي لاعب من الأرجنتين لازم نكسبه، وكل واحد فينا كان داخل المباراة عايز يدي أقصى حاجة عنده".

وأتم رامي ربيعة، تصريحاته قائلًا: "أي لمسة لصالح لاعبي الأرجنتين كانت بتتحسب خطأ، وفي المقابل كانت بتحصل علينا نفس التدخلات ومكنش بيتحسب حاجة، وكل ما كنا نبدأ هجمة، الحكم كان بيوقف اللعب باحتساب أخطاء لصالحهم، وده كان بيديهم فرصة يهدوا اللعب".