علق طارق مصطفى، المدير الفني السابق لنادي البنك الأهلي، على ترشيحه أكثر من مرة لتولي القيادة الفنية لنادي الزمالك خلال الفترة الماضية.

وقال طارق مصطفى في تصريحات عبر راديو "أون سبورت إف. إم": "عايز الأول بس أشيد بمعتمد جمال، ربنا يوفقه يا رب، أنا باركت له على طول تاني يوم، ومعتمد من الشخصيات النظيفة والحلوة اللي أنت تحبها وتتمنى لها الخير".

وأضاف: "ربنا يوفقه إن شاء الله، وهو ماشي بشكل كويس جدًا، ويعمل حاجة كبيرة مع نادي الزمالك وياخد بطولة إن شاء الله".

وأكمل: "لكن أنا إن شاء الله، أول ما ربنا يريد للكل، مش لطارق بس، الحمد لله أنا بشكر الجمهور للمرة المليون، وهفضل أشكره لأنه دايمًا بيطالب إني أكون موجود، وإن شاء الله أكون عند حسن الظن في يوم من الأيام".

وبسؤاله هل لك شروط لتدريب الزمالك؟، قال: "بص أنا مُقل في الكلام، ومش من النوع اللي بيطلع كل شوية يتكلم، لأني بحب أركز في حاجة معينة، وفي نفس الوقت، الزمالك هو النادي الوحيد اللي عمري ما أقول فيه كذا أو كذا".

وأوضح: "لكن في الفترة الأخيرة قلت إيه؟ قلت إن أنا أكون المسؤول الأول والأخير عن الأمور الفنية، وإن تمرين نادي الزمالك يبقى في النادي مش خارج النادي خالص، خاصة إنك بتدفع أرقام كبيرة جدًا عشان تأجر الملعب، وفي نفس الوقت عليك التزامات مالية كتير".

وتابع: "أنا مش بلعب في نادي شركة أو موظف رايح يخلص شغله وخلاص، لا لازم أحطك تحت ضغط، وعشان أحطك تحت ضغط لازم تخش الملعب وتشوف الجمهور وأعضاء النادي وتتمرن قدامهم، التركيز ممكن يكون قبل المباراة بيومين أروح أتدرب وأدخل معسكر، معنديش مشكلة".

وأتم طارق مصطفى، تصريحاته: "أنا بتكلم من الناحية المادية عشان نوفر، وفي نفس الوقت من ناحية الانتماء؛ لازم تحس بالناس، تحس بقيمة التيشيرت، خاصة إن معظم اللاعبين الموجودين حاليًا جدد، وبالتالي لازم يعيشوا أجواء النادي ويتفاعلوا مع الجماهير، ويبقى وجودهم داخل النادي بشكل مستمر".