أكد إبراهيم حسن، مدير منتخب مصر، أن الجهاز الفني واللاعبين يتطلعون لتحقيق إنجاز كبير خلال منافسات كأس العالم 2026، مشيرًا إلى أهمية استغلال الفرصة الحالية وكتابة تاريخ جديد للكرة المصرية.

وقال إبراهيم حسن في تصريحات تليفزيونية لقناة أون سبورت: "أتمنى نعمل حاجة كويسة لمصر في كأس العالم 2026، وبدأنا إمبارح واتمرنا هنا في الملعب، ونظام اليوم إنك بتخلص تمرين وترجع فيه محاضرات مع كابتن حسام، والنهاردة تاني تدريب، وبنحاول نتعود على فرق التوقيت حوالي 7 ساعات، وده مهم جدًا وبيفرق في التركيز والشغل والجانب البدني".

وأضاف: "اللاعيبة بتتعود على الزمن والمكان، وبإذن الله هنتعود سريعًا قبل الدخول في أجواء المباريات".

وتابع: "لما بننقل الصورة للاعيبة، الأيام القديمة مش سهل تتعوض، وبقول للاعيبة افتكروا الوقت ده وامسكوا في الفكرة والتاريخ، ويا رب كل بطولة نكون موجودين فيها، ولكن كل الأحداث بتتغير ومفيش حاجة مضمونة، فامسك في الفرصة اللي قدامك، وده شرف وتاريخ، ويا عالم فيه لاعيبة هتكون مكملة ولا لا، زي ما شوفت بيكون فيه إصابات، حمدي مثلًا لعب التصفيات كلها ومش موجود معانا للأسف".

وأكمل: "علشان كده بقول امسك في الفرصة، وشرف لينا أنا وحسام إننا لعبنا كأس عالم وهندرب في كأس عالم، وده صعب يتعمل طبعًا، وكان معانا كابتن طارق سليمان في مونديال 90، واللاعيبة لازم تعيش الحالة، والشعب المصري كله مستنيك تعمل حاجة كبيرة، وإحنا عارفين إحنا عاوزين إيه ومش هنفوت الفرصة أبدًا، محتاجين توفيق ربنا واللاعيبة تكون في حالتها".

وأردف: "مستعدين لكل حاجة ومش هنختار مباريات، والمباريات مش بتيجي بالصدفة، وفي الأول والآخر كلها منتخبات وصلت كأس العالم، ومفيش حد منهم وصل صدفة، وهناك منتخبات عملاقة موصلتش، وإيران وصلت مباشرة مثلًا وبلجيكا ونيوزيلندا، فالناس لازم تبعد عن أي حد بيهوّن الأمور".

واختتم إبراهيم حسن تصريحاته قائلًا: "مفيش حاجة اسمها في كأس العالم منتخب سهل، كله جاي على شكل وحوش علشان يكسبوا ويعملوا تاريخ، وإحنا اللي محتاجين نكسر الدنيا ونعمل تاريخ في كأس العالم، ونغير ونكتب تاريخ جديد في المونديال".