كشف حسام عبد المجيد، مدافع الزمالك عن اقتراب رحيله للاحتراف الخارجي، مؤكدًا أن وجهته ستكون إلى الدوري البلغاري، مشددًا على أن هذه الخطوة تمثل بداية لتحقيق حلمه بالوصول إلى دوريات أكبر في أوروبا.

وقال حسام عبد المجيد في تصريحات تليفزيونية: "بإذن الله موقفي من الاحتراف في الأواخر خلاص بنظبط كل حاجة".

وتابع: "أه بلغاريا، ممكن تكون الناس بتقلل من الخطوة بس مش ده تفكيري، أنا تفكيري باخد خطوة تفتحلي خطوات ثانية".

وأكمل: "أنا حاليا عندي 25 سنة لو استنيت أكثر عمري ما هطلع، ومش معنى كده إني كاره النادي لا طبعا أنا من صغري في الزمالك وصعب عليا إني أسيبه لكن ممكن الواحد يبقى زي صلاح مثلا".

وعن ما يتردد بأن الاحتراف سيكون مجرد "كوبري" للانتقال إلى الأهلي: "أنت سمعت طبعا الناس اللي بتقول إنها خطوة كوبري للأهلي، والأهلي نادي كبير وأي حد يتمنى يلعب فيه، لكن الحالة بتاعتي مختلفة".

وأضاف: "لو بفكر بنفس التفكير ده كان زماني قضيت الـ6 شهور الباقيين في عقدي ومضيت عادي، بس أنا معملتش كده، أنا استنيت غصب عني لأن مكانش فيه حاجة جت".

وأردف: "جاتلي السنة دي وحبيت إن الزمالك يستفيد، وأمشي من خلالهم لأنهم ليهم فضل عليا، أنا عقدي مع الزمالك مكانش أحسن حاجة، وأنا طول عمري في النادي".

وعن احتمالية الانضمام للأهلي.. قال: "لا خالص خالص، أنا عايز أشرف النادي بتاعي وافتح الباب للاعيبة الزمالك للاحتراف، واحترف وارجع للنادي تاني عادي".